مغامرات خريج جديد-الحلقة الاولى والثانية | جوبس للتوظيف

قصي العربي

كلام سليم
بتذكرني بشركه من الشركات في غزة والشركه فرع لشركة بالضفه
مدير فرعهم بغزة جاب اخوه وشغله
عشان تحلو السرقات

أ. محمود موسى

بصراحة فيديو واقعي ..
و أنا بشاهد فيه بضحك بجد ,, لانو فعلاً هيك الواقع ..

لو حبينا نجاوب على السؤال وين المشكلة ؟!

صراحة المشكلة الجميع يتحمل السبب فيها ...

نبدأ برأس الهرم الحكومة ما بتقوم بتوظيف الخريجين و ان وظفتهم لا توظفهم بناء على الكفاءة !! هالشئ ملاحظ باختبارت توظيف معلم 2010 ..
و ها هي الكارثة الحقيقية أن لا يتم التوظيف بناء على الكفاءة و خاصة إن كان للتعليم !!

ثانياً : المشكلة كمان في الجامعات اللي بات هدفها فتح الجامعات كتجارة !! يعني ما في تخطيط مسبق انو تخصص ما أصبح عدد الخريجين كذا و كذا و علشان هيك بيكفي نطلب هادا التخصص ..
و طبعاً اللي بيتحمل السبب في هيك وزارة التربية و التعليم الا ما بتشوف الجامعات و و بالطبع وزارة التربية و التعليم من مسؤولية الحكومة ...

المشكلة كمان بترجع للخريج انو بينتظر فرصة واحد و هي اختبار التوظيف و يصبح ينتظر و ينتظر و إن فشل سواء السبب واسطة او عدم توفيق او عدم دراسة ,, بيرجع تاني لنفس الموال من اول و جديد ادرس و انتظر و انتظر !!
برأيي الحل في هيك شئ أنو الخريج ينمي نفسه بدورات أخرى يكون غرضها انو ممكن الخريج يشتغل بنفسه من دون ما يحتاج انو شخص يتفضل عليه و يوظفه !!!
مش شرط يشوف شغلات بمجال تخصصه يشوف تخصصات تانية لانو في كتيير ناس ما اشتغلوا ع شهادتها و نجحت نجاح باهر سواء في عملها او في راتبها و كان هالشئ من خلال دورة او شئ استفاده نفعه لحصول على الوظيفة ..
و بالنهاية كان هالشخص مرتاح لانو هو رئيس نفسه مو حدا يفرض عليه اوامر لشغله !!

اللي بدي أصل انو المشكلة الجميع يتحمل السبب ,, و بالنسبة لي بعتبر الخريج هو السبب الرئيس ..

شو فيها لو الانسان بعد ما يخلص يتعلم أكتر من شئ تاني ,, عادي جداً الانسان يتعلم و يتعلم و يتعلم و مش خسران شئ !!
حط ببالك تتعلم اشياء تستفيد من وراها مو فقط تضيعة وقت !!


و بالنهاية كل شئ مقدر و مكتوب و بس برأيي إنو الانسان يسعى و يسعى و ما ييأس و يتوكل على ربه و إن شاء الله ربنا بيوفقه و يوفقنا جميعاً لذلك ...


مشكووووووورة كتيير مهندسة غدير و بارك الله فيك ِ ...

*احمد*

بتتكلم حضرتك وكأنو في فرص تانية الخريجين سايبينها او مضربين عن التعاطي معها ؟ انا شخصيا شاهد على عدة طوابير للخريجين العاطلين عن العمل كلهم على ابواب موظفين سواء حكومة او وكالة او قطاع خاص او حتى قطاع عفاريت ! مين اللي حكى لحضرتك انو الخريجين بينتظرو ؟ بحكي عن تجربتي مافي باب ما طرقته ووالله العظيم احاسب عليها انو الواسطات والمحسوبيات كانت هي العائق الوحيد امامي !

برضو انا مش عارف على اي اساس حضرتك بتحكي ؟ على اساس انو الخريج هادا مليونير ومش عارف وين يودي الفلوس , انت مش عارف انو طلع من مصاريف الجامعة بأعجوبة .. وفي الاخر بيلاقي حضرتك بتحكيله روح خود دورات !!! وعلى فرض انو اخد دورات ما كلها سنة ولا اتنين ورح ينسى اصلا الدورة وين اخدها ويرجع مكانك سر ومنتظر رحمة ربنا بس ,,

بتهيألي المؤسسات لما تنزل الاعلانات اصلا ما بتطلب الدورات حتي الحكومة ,, كل اللي بيطلبوه خبرة سنتين تلاتة بس .. مش عارف من وين الخريج بدو يجيبهم ,, اذا لا حكومة ولا وكالة مدورة عليه ,, روح قدم طلب في مكتب العمل بيقولك الوظايف واقفة من سنوات وبيضحك الموظف .. مش عارف على شو بيضحك ... , روح عالوكالة بقولك برامج البطالة واقفة !! طب ازا هالقيت برامج البطالة واقفة .. انا مش عارف ايمتا بدها تشتغل ؟؟!!

اه .. لا من الناحية هاي تقلقش.. مرتاح كتير لا شغلة ولا مشغلة .. ومفش حدا اصلا بيفرض عليه اوامر لشغله لانو اصلا فش شغل .. !!

لا هي فيهاش اشي خالص ..كلها 4 ولا 5 سنين ضيعها من عمره وفلوسه عشان بعدها يتعلملو اشي تاني !! مش خسران ؟؟ الله يثبت علينا العقل والدين بس يا شيخ

هو احسن اشي انو الحكومة الحلوة تعتنا تاخد ضريبة بدل قعدة عالخريجين العاطلين عن العمل + ضريبة مضيعة وقت .. لانو خسارة فعلا عالوقت اللي بيضيع عالفاضي !!

اها فعلا .. بس بدي اسألك ياريت انت موظف في اي مدرسة ؟؟ مهو الي ايدو في المية مش زي اللي ايدو في النار

هبوش الترك

فعلا هادا هو واقع الخريجين 100%
راح انضل انلف انلف على الفاضي واذا لقينا واسطة ومشيت هينا اشتغلنا
وطبعا فى القطاع الخاص الواسطة الكم يا شباب ما بتنفع لازم انكون صبايا للاسف

ربنا يفرجها علينا كلنا

غزة الحصار

المشكلة انه الناس بعدت عن الدين وصار كل شىء بلا اخلاق
بدك تشتغل اهم شىء يكون عندك واسطة واذا ماعندك خليها للحظ بس يتصدقوا ان عندي طريقة بتخلينا كلنا نشتغل ومش مزح بجد
.
.
.
.
.
(اذا باب العباد اغلق باب الرحمن لا ولن يغلق اخوتى عليكم بالاستغفار)
شكرا جزيلا للرائعة المهندسة غدير

جامعه الازهر

كلامك ياحمد صحيح شايف الواحد ملياردير مشان يدرس اكتر من تخصص ماخلص جامعه الا وهو مستوي دفع فلوس كلام كلو تافهه ال شو خد دورات وادرس من جديد والله صحيح الله يثبت العقل والدين شكلو مديربالوكاله الي بيتكلم بس ياريت تعرف شو بتحكي وفكر شوي قبل لتعلق

أ. محمود موسى

مين قال لك أنا موظف في مدرسة !!
أخي انا قصتي نفس قصتك ,, يعني لا تفكر إيدي بالمية !!
أنا تخرجت من شهر 8 لعام 2010 و طبعاً بعد ما تخرجت ما تتخيل لكم وظيفة قدمت !! ما يقرب من 20 سي في و انا برسل و في الاخر فش فايدة مع انو معدلي عالي على تخصصي ..
و يااااااه لو تشوف حالتي كل لما اقدم سيرتي الذاتية في وظيفة احكي خلاااااااص هالمرة هتزبط و الوظيفة لي يعني لي ههههههههه
لكن !!
هيك بلدنا ,, ان شاء الله تتغير ..


صرت اخد دورات و فقط لاني جد مليت و قرفت حالي ,, القعدة في البيت دبحتني !!!
لحتى ما أتى يوم 1-5 -2011 قدمت اختبار وكالة و الحمد لله طلعلي يومي مدرس علوم لمدة سنة و ما زلت اعمل ,, لكن يا أخي هأرجع لنفس قصتك !! يعني ايدي مش بالمية
و طبعاً لا زلت باخد دورات و كل لما اخلص دورة هآخد تانية بإذن الله
لانو ببساطة ما بضمن هل لو قدمت اختبارت توظيف هتوظف و لا لأ !! لهيك بحاول اوظف نفسي بشئ تاني ...
طبعاً انظلمت و غيري من عدم تقديم اختبار توظيف حكومة في عام 2010 و خاصة تخصصي وقتها ما كان جميع اللي هيقدموا اختبارات التوظيف في القطاع من الشباب لا يتجاوز ال 100 طالب !!
لكن شو صار ما شاء الله الحكومة وظفت اللي رسبه في اختبارات التوظيف في تخصصي !! و وظفت اللي معدلاتهم بتخزي !!
أرجو الصورة تكون وضحت ...


و ربي ضحكت ..
مدير بالوكالة ههه
أخي انا نفسي نفسك خريج و بيستنى مثلك الوظيفة ..
و انت شايف يا أخي في البلد الواسطة شغالة في بلدنا شو نعمل !! نقعد بالبيت 4 سنين او 5 بدون عمل !!


انا يا أخي معك في واسطة و في ناس ما بتعرف ربها في التوظيف و بتعين اللي بتعرفها و هاد شئ دبحني و جميع الخريجين ....
بدك تحكي نمنع الواسطة !! صدقني بحسب اللي شفته ما هتقدر
احكيلي انت شو الحل !!


أنا بحكي كلامي لانو قعدت سنة كاملة بالبيت من دون وظيفة و اندبحت !! فاهم شو اندبحت !!
فما بالك لو قعدت سنتين او ما يزيد ,, بفكر في المستقبل لو ما توظفت ع شهادتي افتح مشروع اطبق فيه كل اللي تعلمته في الدورات او الجامعة ..
و بعدين في ناس بتدعم مشاريع بقروض حسنة ....

أول شئ يا أخي في دورات مجانية ومعتمدة اعتماد كبير ..
أنا عن نفسي أخدت دورتين وحدة 6 شهور و كمان هالوقت بدورة و مدتها ما يقرب 4 شهور أو يزيد و الاتنين مجانيات ...
و طبعاً اخدت دورات مدفوعة شو فيها لما 150 شيقل او 200 تستفيد من دورة تفيدك بكرة ..
هل لازم تكون ملياردير !!!
مين افضل تنتظر سنيتن او 3 بدون ولا شئ او تستفيد من شئ تعملته و تشتغل ...

انا لما اخد اي دورة بحكي يا رب اجعلني استفيد منها ...

و ربنا يوفقك و يوفقني و الجميع ...
لانو صدقني اخي كل شئ توفيق من عند ربنا ...

و نسيت احكي شكرا لك ع الدعوة ربنا يثبتني ع الدين و العقل

و تحياتي لك و للجميع ...

مس نسمة

السلام عليكم
اولا المشكلة في التعليم لاننا بندرس شي والحياة العملية والشغل شي تاني يعني بنضيع 4 سنين من عمرنا بالجامعة وبعين ما بنستفيد الا من ماة او اتنين بالشغل والباقي كله عالفاضي والدليل امتحانات الوكالة بتعتمد علي مادة اساليب التدريس وطرق التدريس وبس يعني جهد ووقت وفلوس بالجامعة رايح عالفاضي
تانيا الجامعة بتترك الخريجين يروحوا ما بتهتم فيهم يعني عالاقل المفروض توفرلهم فرصة تدريب داخل الشركات والمؤسسات الخاصة او العامة لمدة 3 شهور وهيك الخريج بيكون معه خبرة
تالتا المؤسسات اللي بدها خبرة كيف الخريج بده يكون عنده خبرة وانتوا ما بتقبلوا تشغلوه ولو اشتغل بدكم تهلكوا وبتعطوا راتب ما بيكفي مواصلاته وبعدين في كتير من المؤسسات والمراكز ما بتقبل انه الخريج يدرب عندهم بحجة انه ما في فراغ وما في اله حاجة يعني هو بيكون عبء عليهم
الله وحده هو القادر يساعدنا وحسبي الله علي هالقوانين

الاستاذة عبير الورد

الشركات بتعقد الناس أحيانا بكون الشخص خريج جديد وبكونو طالبين سنوات خبرة طيب الخريج من وين بدو يجيب سنوات خبرة هو جديد متخرج هذا اشي بجنن

شجرة الخريف

والله المشكلة في المجتمع ككل

Omar_Gaza

اشهد بالله انه كلامك صحيح

غدير ام مؤمن

شكرا لمروركم وتعليقكم

وفقكم الله اجمعين ان شاء الله

محمود مهدي

السلام عليكم
تعليقاتكم جميعها من الواقع وتحياتي خاصة تعليق أحمد وغيره من الشباب.
ما استغربه الكل بيحط اللوم علي الطالب يا اخي من يوم ما خلقت الدنيا هناك فورقات شخصية في درجة العلم يعني المتفوق يحق اله يتوظف وغيره يا اخي ليش تقبل جامعات غزة المعدلات المتدنية في الاصل وليش كذلك تفتح جامعات جديدة ما هما غير جني المال من الطالب وليش وزارة التربية والتعليم في غزة اتوافق علي منح الجامعة الجديدة في غزة التراخيص. هذا جانب.
بخصوص اعلانات الحكومة للامانة يحطيها العافية خدمة الطالب لرمق الاخير لدرجت انها نزلت اعلانات في شتى المجالات، والطالب يتعب وبيدرس واذا حالفه الحظ ودخل المقابلة بتشتغل الواسطة الي ما اله واسطه بتروح عليه في المقابلة وحتي اذا نجح الطالب بجدارته بيكون دوره متاخر ويضل ينتظر دوره علي القائمة وبعد فترة محددة من الزمن يلغوا الدور وهكذا من يوم ما عرفنا الحكومة بس انا المستغرب منه ليش ما ياخذوا كل الي علي الدور بس.
يعني من الاخر الخريج الي ما اله واسطة ايش يعمل وها السوال باسالة للمسوول عن هاد الشعب الي راح يحاسب عن كل شخص في هاد الشعب.
وبقولك خلص استكفنا من الدور ما بدنا حد خلصت الشواغر بس في وجه الشاب الغلبان اما الي قريبه وزير او عضو تشريعي ماومسوؤل في التنظيم ما يعيقه دوار ولا امتحان بدل ما تركب سيارة ثمانه يصرف علي 10 خريجين وحراس ونثريات خلي جزء من هادي النتريات والمصاريف الحكومية جزء منها لدعم الخريجين ولا الموازنة بتقف فقط في وجه الخريجين.
وفي النهاية بنقول حسبى الله ونعم الوكيل فى كل ظالم.........

hla_yes

الله ينور عليكي بالفعل هذه مشكلة الشباب والبنات واللي بشتغل فقط الواسطة فتيامين و بس الله أكبر من الواسطة بس الواحد يصبر ويدعي ربنا مشكووووووووورة علي الموضوع

باحثة عن عمل

جوبس للتوظيف تقدم الحلقة الثانية من مغامرات خريج جديد ،شاهد الحلقة واعطينا رأيك


ما تعليقك؟